Musiekblyspel / Kultuurskok
Riebeeckrand bied elke 2de jaar ‘n musiekblyspel van hoë gehalte aan. Dit is vir elke leerder ‘n wonderlike geleentheid om hulle talente uit te leef. Die jare waar daar nie ‘n musiekblyspel aangebied word nie, bied ons ‘n Kultuurskok vertoning aan waarin al ons kultuuritems verskyn.

2018 Kultuurskokvertoning
In 2018 het Riebeeckrand ‘n Kultuurskok vertoning aangebied waarin al ons kultuuritems verskyn het. Dié vertoning was uit die boonste rakke en is ‘n goeie vertoonvenster van ons skool se talentvolle leerders en personeel. Met die groot verskeidenheid dans-, sang- en drama-items was die gehoor meegevoer en deurentyd vermaak.

Op 25 September was Randfontein se bejaardes met ‘n gratis vertoning bederf. Ons juniorraad het die tafels prentjiemooi gedek en die bejaardes met heerlike vingerhappies, koek en tee bedien waaraan hulle kon smul tydens die vertoning. Die leerders het soveel moeite gedoen en die bejaardes op hul hande gedra.

Op 27 September was daar ook ‘n Toneel-tableau gehou waartydens die twee toneelgroepe, Bomskok en Verlore generasie, hul uitmuntende tonele opgevoer het. Dié toneelgroepe het al talle pryse ingepalm deur die loop van die jaar. Dit was ‘n besondere geleentheid vir ouers en ondersteuners, en word daar nou met groot afwagting uitgesien na 2019 se tonele.

Riebeeckrand sien daarna uit om in 2019 weer ‘n stampvol saal te vermaak.

 Kultuurskok 2018 1  Kultuurskok 2018 2

Bomskok 2018  Verlore Generasie 2018