Riebeeckrand se netbal weer aan die voorpunt

Vanjaar het Riebeeckrand weer ‘n uitstekende netbalseisoen agter die rug. Drie van ons netbalspanne, 0/14’s, 0/16’s en 1stes, het al hul liga wedstryde gewen, en is as ligawenners aangekondig. Die 0/15’s en 0/17’s het met trots 3de in hul liga geëindig. Al 5 dié netbalspanne het deurgedring na Inter Distrik uitspele waarna die 0/17-netbalspan verder deurgedring na die JOMO uitspele.

Ons is baie trots op al ons netbalspanne en afrigters. Dit is wonderlik om te sien hoe toegewyd en passievol die dogters en afrigters is. Hulle pluk voorwaar die vrugte van harde werk. Wel gedaan!

 0 17 netbalspan 2019

(0/17-netbalspan: Deurgedring na die JOMO uitspele).

7de Riebeeckrander deur na ATKV-finale ronde ATKV Redenaars Finaal 2019

Werner Gabriël, ‘n gr.11-leerder, het op 1 Junie ‘n 1ste plek by die ATKV-redenaarskompetisie se semi-finale ronde, in die addisionele taalafdeling, behaal. Werner het met dié puik prestasie deurgedring om aan die Nasionale finale ronde van die kompetisie deel te neem. Die Nasionale finale ronde gaan op 2 Augustus 2019 by ATKV Goudini Spa plaasvind.

Dit is vanjaar die eerste keer wat Werner deurdring na die Nasionale finale ronde. Hy is opgewonde en sien daarna uit om Riebeeckrand met trots te gaan verteenwoordig. Die Riebeeckrandfamilie is baie trots op hom en wens hom ook sterkte toe met sy deelname aan die finale ronde van dié redenaarskompetisie. Dit is reeds die 7de keer wat ‘n Riebeeckrander aan die nasionale finale ronde deelneem.

Riebeeckranders deel van Goue Leeus Akademie Goue Leeus Rugby 2019

Ons is baie trots op drie van ons 1ste-rugbyspanspelers, Luke Myburgh, Tiaan Barnard en JP Nel, wat tot die 0/18 Goue Leeus Akademie XV verkies is. Dit is voorwaar ‘n besondere prestasie om deel van dié span te wees, aangesien honderde seuns aan die proewe deelneem.

Daar was drie rondes proewe gewees asook twee opwarmingswedstryde, teen die Valke en die Blou Bulle, waartydens die spelers hul beste spel moes voortsit om span te haal. Luke is die trotse haker van die 0/18 Goue Leeus Akademie XV span en Tiaan en JP die uitmuntende flanke.

Riebeeckrand wens die drie seuns sterkte toe met hul deelname aan die Akademie Week wat gedurende die skoolvakansie in Bloemfontein plaasvind.

Puik hokkieseisoen vir Riebeeckrand

Hoërskool Riebeeckrand is bekend vir hul uitstekende hokkiespel en top prestasies wat jaarliks behaal word. Riebeeckrand neem al jare aan die medium skole hokkieliga deel en vaar uitstekend teen hul mededingers.

Vanjaar het al 4 ons A-spanne onder die top 3 van dié liga geëindig. Ons seunshokkie vaar ook uitstekend. Die hokkieseuns se ligawedstryde hervat na die Junieskoolvakansie. Die Riebeeckrandfamilie wens hul 1ste-seunshokkiespan sterkte toe met hul 4 oorblywende ligawedstryde wat eersdaags plaasvind.

Hokkie Liga 2019

(0/16's, 1stes en 0/14's het deurgedring na die liga uitspele).