Riebeeckrand - 'n dinamiese skool in Randfontein Poort 2021
Hoërskool Riebeeckrand is ‘n dinamiese hoërskool in Randfontein. Riebeeckrand is ryk aan geskiedenis, tradisies en waardes en streef vandag nog hul visie en missie na. Vanjaar vier hulle hul 25ste bestaansjaar en is steeds ‘n baken van hoop in ons gemeenskap.

Die Riebeeckrand-familie is daarop gerig om sy leerders te ontwikkel en te vorm tot die beste weergawe van hulself, sodat hulle met hoop die toekoms kan begin. Riebeeckrand bied vir hul leerders ‘n skatkis vol aktiwiteite waaraan hulle kan deelneem. Daar word uitmuntende sport-, kultuur- en akademiese prestasies jaarliks ontvang.

Riebeeckrand het ‘n totaal van 15 sportsoorte waaraan leerders kan deelneem, 11 kultuuraktiwiteite en fantastiese vakkeuses wat vir leerders ‘n breë spektrum van studie- en beroepskeuses bied.

Op die sportveld en kultuurgebied leef die onderwyser hul in met die afrigting en streef net na die beste vir hul leerders. Riebeeckrand beskik oor 2 rugbyvelde, 2 hokkievelde, 7 netbalbane, ‘n krieketveld en oefennette, jukskeibane, ‘n boogskietbaan, ‘n atletiekbaan asook ‘n volledige toegeruste gimnasium. Kultuur is ook hoog op Riebeeckrand se prioriteitslys en val gereeld onder die Top 10 van die NEA, RACA en talle ander kompetisies.

Die personeel investeer in hul leerders. Hulle gee om vir die leerders en leerders ontvang topgehalte onderrig. Akademiese struikelblokke word oorkom deur verskeie gratis ekstra klasse wat weekliks aangebied word. Alle klasse is toegerus met dataprojektors en tegnologiese toerusting soos visualiseerders en 2 interaktiewe witborde word gebruik wat die onderrig-leerproses vergemaklik.

Riebeeckrand glo daarin om ‘n goeie balans te handhaaf en daarom is sosiale aktiwiteite soos pretdae, geesvangsessies, valentynsbal, lentebal en Mnr. & Mej. Riebeeckrand ook belangrike gebeurtenisse. Riebeeckrand streef daarna om hul skoolomgewing vir hul leerders ‘n tweede tuiste te maak, waar hulle hard kan werk en ook pret kan hê.

Riebeeckrand verleen gereeld ‘n helpende hand na die gemeenskap, hetsy dit ‘n gebaar van hoop is of self ‘n bydrae is wat gelewer word. Die Riebeeckrand-familie ploeg graag terug in die gemeenskap en is trots om deel van Randfontein te wees.

Maak Hoërskool Riebeeckrand deel van jou kind se hoërskoolloopbaan. Dit is hier waar elke leerder gevorm word, waar herinneringe gebou word en ‘n blink toekoms verseker word.

 

Riebeeckrandpersoneel ook nou ingeënt
Hoërskool Riebeeckrand se personeel was opgewonde om hul inentings te ontvang. Die gewag in ‘n lang ry was definitief die moeite werd. Sommige personeellede was wel skrikkerig, maar ander was bly die lang gewag vir ‘n inenting is verby. Me. Letsie Grobler beskryf haar inentingervaring as ‘n pynlose en aangename ervaring. "Die suster wat my ingeënt het, was baie behulpsaam. Sy het die proses baie mooi aan my verduidelik asook watter newe effekte ek na die tyd kan ervaar en watter medikasie ek daarvoor kan gebruik." Me. Tianie Barnard was wel vooraf op haar senuwees gewees, maar na die tyd dankbaar dat sy wel die inenting ontvang het. Vir haar is dit belangrik om die leerders en haar kollegas veilig te hou en dié inenting bied aan ‘n mens daardie geleentheid. Sy sê "Die virus eis mense se lewens en ons moet saamstaan om mekaar veilig en gesond te hou." Me. Livia du Plooy het reeds maande gelede besluit dat sy ingeënt wil word en was bly dat sy nou die geleentheid gekry het.

Meeste personeellede het ligte newe-effekte ervaar soos naarheid, koors, kopseer en lyfseer, maar was na ‘n dag weer hul ou self. Personeellede was in tydsgleuwe ingedeel vanaf 23 – 25 Junie asook op 28 Junie om hul inentings by Greenhills Sportstadion te ontvang.

Me. van den Berg is saam met haar personeel dankbaar dat hul die inenting kon ontvang en op die manier die skoolomgewing kan beveilig. Dit is die eerste stap om die verspreiding van die virus te bekamp. Sanitering, hou van sosiale afstand en die dra van maskers bly steeds die goue reëls, Riebeeckrand het en sal dit steeds getrou nakom.

Riebeeckrand leef met hoop
Op Hoërskool Riebeeckrand se terrein is bome in geel getooi wat hoop simboliseer.

Ons lewe in uitdagende omstandighede. Geliefdes word siek en geliefdes sterf. Swaarkry word ‘n groter realiteit. Maak nie saak hoe uitdagend die lewe raak nie, hoop bly altyd staan.

Hoërskool Riebeeckrand glo in die krag van hoop - hoop op 'n goeie toekoms; hoop op die herstel van ons land; hoop dat ons personeel, leerders en gemeenskap moed sal hê om vorentoe te stap; hoop dat ons sal aanhou droom oor die goeie in die lewe; hoop dat Geloof ons elke dag sal dra. Riebeeckrand leef met hoop en daag die Randfontein-gemeenskap uit om saam met hulle met hoop te leef.

Bome van hoop 2

Drie netbaldogters deel van Gauteng oefengroep
Ten spyte daarvan dat daar in 2020 amper geen sportbyeenkomste plaasgevind het nie, is Riebeeckrand se netbaldogters weer vuur en vlam op die netbalbane. Dié dogters presteer uitmuntend in hul spanne, asook individueel. Op 15 April 2021 het al die netbalspan hulle eerste netbalwedstryde teen Krugersdrop High, gespeel. Sewe van Riebeeckrand se spanne het hul wedstryde gewen, een span het gelykop gespeel en slegs een span het hul wedstryd net-net verloor. Aangesien vanjaar se sportbyeenkomste nie deur ouers en ondersteuners bygewoon mag word nie was die 1ste-span se wedstryd op die skool se Facebook blad lewendig uitgesaai, sodat ouers en ondersteuners steeds in die opwinding kon deel.

Die netbalspanne het vyf wedstryde gespeel voordat kontaksport op 19 Mei deur die departement van onderwys gestaak is. Ons leerders het hard geoefen en dit baie geniet om weer terug te kon wees op die netbalbane. Hulle is dankbaar vir die geleenthede wat hulle gehad het om te kon speel en boonop uitstekend kon presteer.

Jaar na jaar spog Riebeeckrand met ‘n klomp netbaldogters wat in die D2-span en Gauteng oefengroep opgeneem is. Vanjaar spog hulle weer breëbors met 9 dogters wat in die D2-span opgeneem is en met 2 dogters wat deel is van die Gauteng oefengroep.

Die dogters wat in die D2-span opgeneem is, is: Omolemo Molokela (0/14), Karabo Motsisi (0/14), Kopano Mzondi (0/14), Angela Nkomo (0/14), Kerathilwe Motshaba (0/15), Rendani Mashao (0/15), Chantey Zaayman (0/17), Devonique Breedt (0/18) en Nicola Van der Merwe (0/18). Die 3 dogters wat verder deurgedring het en in die Gauteng oefengroep opgeneem is, is: Karabo Motsisi (0/14) en Chantey Zaayman (0/17) en Devonique Breedt (0/18).

Riebeeckrand is baie trots op hul netbaldogters en hul afrigters.